• Home

Bilang sangka multi awarded writer ag national youth leader, nangin sambilog sa resource speaker sa ginhiwat nga tourism congress si sb member phillip yerro kimpo jr., chairman it committee on tourism ag isaea man sa mga board of director it aklan tourism officers association (aktoa) it banwang kalibo ku setyembre 22, 2016 sa gov. Corazon legaspi cabagnot tourism & training center.

Gintalakay ni sb member kimpo ro parte sa tourism promotion in the age of social media. Suno kana, rondayang topiko ro pinaka-best practice tag imaw pa hay naga-trabaho sa national television bilang sangka editor in chief. Suno kana, haeos tanan hay naga-gamit it social media. Sa kaabo it mga naga-post sa mga social media, uwa eon haeos it oras para tan-awon o basahon o kun ano ro pagataw-an it prayoridad. Sa aspeto man it turismo, ana nga gintur-an it mga pwedeng ubrahon agud mapan-uhan ag taw-an it interes ro mga tourism destination ku probinsya it aklan pina-agi sa social media.  Ginpahayag pa gid nana kun ano ro best practices sa social media kun paano i-promote ro tourism destination kamana ku: knowing the title ag knowing the audience ag iba pang mga topiko.

Samtang gin-eksplekar man ni flight officer nino alejandrino it cebu pacific ro parte sa role of the airline industry in tourism. Gin-istorya man ni ms. Fredilyn fernandez, lead cabin crew it cebu pacific, ro anang istorya it kabuhi, ro parte man sa agritourism: making it work at the local level pina-agi kay ms. Angeles gabinete it guimaras, ag rong plans & programs of the department and orientation on accessible tourism halin kay ms phoebe areno it dot region 6.

BY: DONIEL B AGUIRRE

FOR IMMEDIATE RELEASE

REFER TO: RON BAUTISTA, COMMUNITY AFFAIRS OFFICER II, PAICD, MEEDO.

Aprubado it sangguniang bayan it kalibo ro draft ordinance no. 54  nga hugot nga naga-rekomenda sa alkalde nga istriktong ipatupad ro ordinance no 2012-015 – an ordinance requiring the registration of dogs and other pets, regulating of stray dogs and other animals & providing penalties for violations thereof.

Suno kay sb member mark quimpo, base sa rekord it kalibo municipal police station may mga vehicular accident nga ginaka-imbolbahan it mga stray dogs nga naga-total it 34 vehicular accident umpisa it enero 2015 – december 13, 2016, may 1 nga namatay gid, 5 – physical injuries, 19 – physical injuries & damage to properties, 9 – damage to properties. Nagapati man si sb member quimpo nga maabo ro naha-angkit it mga ayam pero bukon it available ro personnel sa animal bite center para pangayuan it rekord ngani positibo imaw nga maabo gid ro naha-angkit it mga ayam.

Ginpa-abot pa it konsehal nga gina-implementar man it municipal agricultural services division (masd) ro registration it mga dogs, pero gina-hinyo it konseho rong full and strict implementation it ordinansa. Ginpa-abot pa gid nana sa alkalde nga ro konseho hay magasuporta gid sa alkalde kun magakinahang-ean ra it mga budgetary requirements nga paga-kinahang-eanon sa pagpa-ubra it mga kulungan ag sa mga tawo nga kinahang-ean.

Ginpa-abot man ni sb member buen joy french nga may ginpa-ubra eon nga dog cage ag pagadaeahon eon rayon sa municipal slaughter house pero kueang it dog catchers ag service vehicle.   Gin-rekomendar man ni sb member cynthia dela cruz nga mag-ubra it dog pound program sa masd.

Ro resolusyon hay gin-proponer nanday sb members mark quimpo ag mark ace bautista.

Gin-uli ni ms. Genelyn zagales it brgy. San ramon malinao ro 1st prize sa ginhimo nga slippers decoration contest may kaangtanan sa selebrasyon it tourism week umpisa ku setyembre 19 hasta it 25 it rayang dag-on. Sa pagpatikasog it aklan tourism officers association (aktoa) nga ginapamunuan ni ms. Rhea rose meren, tourism operations officer it lgu kalibo, kaibahan ro tanan nga mga tourism operation officers sa probinsya it aklan, napilian it mga hurado rong tsinelas nga gin-ubrahan it dekorasyon it sangka malinawnon samtang ha-adto man ro 2nd place kay ms. Angela cawaling it sti college kalibo ag rong 3rd place hay nahabu-oe ni ms. Caridad granflor ku samahan ng mga kababaihan sa bayan ng kalibo (skbk).

Kadungan ku slippers decoration contest nga ginpartisipahan it may kapin sa 14 ka participants, ginhimo man ro feature writing contest kun sa siin ro nangin 1st place hay si ms. Rea grace custodio it makato integrated school, 2nd place si mr jason nagin it sti college kalibo ag ro 1st place hay si mr. Jemwel garcia iii it asu kalibo.

Sa kauna-unahan nga kahigayunan nga paghimo it dance contest it aktoa para sa tourism week celebration makaron nga dag-on pina-agi sa tema nga “tayo mismo ang turismo”,  6 ka mga grupo it pamatan-on nga may hilig sa pagsaot ro hataw-an it tsansa nga magpakita ku andang talento sa ginhimo nga dance contest sa activity area it citymall sa kalibo. Gin-uli it velocity x dance crew rong 1st place nga may premyo nga p5,000, 2nd place ro the brotherhood nga may premyo nga p3,000, ag 3rd place ro nvc mix up crew nga may premyo nga p2,000. Samtang, ro mga consolation prices nga tig p1,000 hay ginbaton man it sti college kalibo, matrix x group halin sa makato, ag nvc hrm dance group halin sa kalibo ag malay.

Sa ngaean man ni mayor william lachica, gin-award ni sb member philip yerro kimpo jr. Kay mr. Milky arboleda, rong resolution of commendation ku sangguniang bayan it kalibo.

Kaparte ku 2016 tourism week celebration ro slipper decoration contest nga pagahimuon sa setyembre 19, 2016 it mga bandang alas 10 sa agahon hasta it alas dose sa udtro adlaw sa provincial capitol lobby. Tungod kara, gina-imbitahan it aklan tourism officers association (aktoa) ro tanan nga mga akeanon nga mag-entra sa pa-kontest para maka-uli it mga pa-premyo ag makilaea pa bilang mayad mag – decorate it mga tsinelas. Uwa it registration fee ro kada participants pero daehon eamang nanda ro kaugalingon nga mga materials for decoration ag ro aktoa ro magata-o it white rubber slippers sa kada participant. Pwedeng gumamit it bisan ano nga material nga pang-dekorasyon pero dapat hay locally sourced o indigenous sa akean. Kinahang-ean man nga ro decorated slippers hay matibay ag pwedeng suksukon. Makaron eon nga adlaw ro deadline it registration ag ro registation form hay pwedeng makabu-oe it kopya sa mga municipal tourism officers sa aklan o pwede man sa aktoa facebook fan page.

Rong designs hay pagatan-awon ku mga hurado it aktoa base sa creativity – 40%, use of indigenous materials – 20%, originality – 30%, over all design and impression of the entry – 30%.  Ro 1st prize winner hay magabaton it p3,000.00, 2nd prize winner – p2,000.00, 3rd prize winner hay p1,000.00 ag may consolation prize nga p500.00 sa magiging 4th hasta sa 10th placers.

Ro announcement of winning entries hay pagahimuon sa city mall sa oras it opening program kaeakip man ro pag-display kara ag pagbaligya.

 

Suportado it gobyerno munisipal it kalibo, sa pagpamuno ni mayor william lachica, ro programa it department of environment and natural resources (denr) nga “bayan ko, linis ko”.

Sa meeting nga ginpatawag sa munisipyo it kalibo, pinaagi ku taeatapan it solid waste management services nga ginapamunuan ni ms. Adorada reynaldo, public services officer ii, kaibahan ro nagakasari-sari nga civil society organizations, academe, business sector, mga opisyales sa kabaranggayan ag iba pa, gin-istoryahan kung paano maipatigayon rondayan nga programa iya sa banwa it kalibo.

Rondayang programa hay may katuyuan nga  mai-promote ro kalimpyo it baybayon ag mga inland waterways, kanae, creek, mga pampublikong lugar, eskwelahan, simbahan, public ag private establishments ag iba pa.  Tuyo man kara nga pahueagon ro mga local government units para sa sang adlaw nga pagpanglimpyo nga paga-partisipahan it tanan nga sektor it sosyodad.

Ka-angot man raya sa pagpabaskug ku implementasyon ku republic act 9003 – ecological solid waste management act of 2000.  Nakataeana ro dueongan pagpanglimpyo  sa  setyembre 17 sa mga lugar nga ginpili it kada grupo.  Kinahang-ean eamang nga sayod ro taeatapan it swms ag denr ku target nga limpyuhan it kada grupo.

Angot kara, gina-imbitahan ro mga pumueoyu it banwa it kalibo nga maki-parte sa nasambit nga aktibidad.  Ro buean it setyembre pinaagi sa proclamation no. 244 series of 1993, hay gindeklara nga national clean-up month.