• Home
  • Munisipyo it Kalibo, kaibahan ro 2 pa ka mga Ahensya it Gobyerno, gin-edukar ro mga Fish Traders parte sa mga isda nga gin-gamitan it dinamita

Munisipyo it Kalibo, kaibahan ro 2 pa ka mga Ahensya it Gobyerno, gin-edukar ro mga Fish Traders parte sa mga isda nga gin-gamitan it dinamita

02 OCTOBER 2019

By: Doniel B Aguirre

Refer To: Ms. Fritzie Anne P Rillo, Information Office

Agud madasig nga madetermina ku mga Fish Traders ag Industry Stakeholders kun ro isda nga hadakpan hay gin-gamitan it dinamita o kun uwa, isaeang ka oryentasyon agud masayran kun ro pagdakup it isda hay paage sa dinamita ro ginhimo kahapon Oktubre 1, 2019 sa Community Fish Landing Center, Brgy. Mabilo, Kalibo.

Sa pagpatigayon ku Agricultural Services Division, Bureau of Fisheries and Aquatic Resources Aklan ag Office of the Provincial Agriculturist – Aklan, ginturo sa mga Fish Traders, Market Supervisors, Inspectors ag mga Agricultural Technologist nga naka-destino sa Fisheries Sector ro mga palatandaan kon ro sangka isda hay nahadakup pa-age sa dinamita.

Makilaea ro sangka isda nga gin-gamitan it dinamita kun may nagatueo nga dugo sa guwa it ana kara nga hasang; naga-katagak ro himbis sa tunga nga parte it eawas; may pilang ka mga internal organs ro naga-guwa sa idaeom ku ikug it isda ag may pilang ka mga parte it eawas ro wasak. Sa sueod nga parte it isda, makita man nga ro kasudlan o organs hay wasak ag may kahalo nga dugo ag iba pang mga sintomas ro patimaan nga gin-gamitan ro mga isda nga makarondaya it dinamita.