• Home
  • Munisipyo it Kalibo ag mga Kabaranggayan, nagahimo eon it misting kontra sa namok nga may Dengue

Munisipyo it Kalibo ag mga Kabaranggayan, nagahimo eon it misting kontra sa namok nga may Dengue

29 JULY 2019

Subject: Munisipyo it Kalibo ag mga Kabaranggayan, nagahimo eon it misting kontra sa namok nga may Dengue

By: Doniel B Aguirre

Refer To: Ms. Fritzie Anne P Rillo, Information Office

Ginpasaeamatan gid ni Dr. Makarius Tel Aviv Dela Cruz, Municipal Health Officer it Kalibo ro Brgy. Council it Tigayon sa ginhimo kara nga misting agud samaron ro gina-itlogan it mga namok nga naga-daea it dengue bago mag weekend. Suno kay Dr. dela cruz sa Monday Flag Raising Ceremony ku isaeang adlaw, lima nga mga hotspots ro gin kilaea ku mga Sanitary Inspectors ag daya ro mga Brgy. Tigayon, Andagao, Poblacion, Estancia ag Pook. Ro mga Sanitary Inspectors ku Munisipyo it Kalibo kaibahan ro Brgy. Council it Brgy. Tigayon hay nagpatigayon it misting activity matapos nga gin-adtunan ro mga lugar ku nabiktima it dengue ag naghimo it pag-samad ku mga gina-istaran it mga namok kaparehas ku mga tanum, mga botong ag mga kariton. nagpatigayon man sanda it house to house visitation o pag pameay-baeay agud masayran ro posibleng gina-tiniran it mga namok sa sueod mismo it panimaeay.

Ginapahanumdom pa gid sa mga nagadumaea it mga Eskwelahan nga magpang-limpyo sa adlaw nga sabado. Makipag-angot man sa mga Sanitary Inspectors ag mag-kunsolta anay sa Rural Health Units it Kalibo agud ensakto ro pagpatigayon it fogging o pagpa-aso ag misting.

Ginpa-abot pa gid kung Municipal Health Officer MHO nga nagataas gid man ro kaso it Dengue sa Kalibo ngani ginahinyo nana ro mga panimaeay sa banwa nga magpang-limpyo. Sa week 29 it morbidity week, naka-lista it 3,080 cases it dengue sa Probinsya ro kina-rekord. Samtang, 620 kara ro sa Kalibo. May una man nga Free NS1 Agent Dengue Test ro MHO Kalibo. Ro mga may eagnat it sang adlaw o daywang adlaw hay umadto eamang sa MHO Kalibo agud ma-tan-aw kun may dengue o kun may ibang ginabatyag.

Ginpasaeamatan man ni Dr. dela Cruz ro mga Empleyado it LGU Kalibo nga nag-donar it dugo sa ginhimo nga Mass Blood Donation ku Martes sa Kalibo Pastrana Park Covered Court kun sa siin 188 ro mga madinaeag-un nga nag-amot it dugo.