• Home
  • Mga Atraksyon Makaron Nga Kapaskwahunan sa Banwa it Kalibo, Ginbuksan Eon Ku Munisipyo it Kalibo Ku Biernes.

Mga Atraksyon Makaron Nga Kapaskwahunan sa Banwa it Kalibo, Ginbuksan Eon Ku Munisipyo it Kalibo Ku Biernes.

By: Doniel B Aguirre

Napuno gid it kahayag ro bilog nga Pastrana Park matapos nga ginpamunuan ni Mayor William Lachica, Vice Mayor Madeline Regalado, mga Sangguniang Bayan Members ag ro dinapit nga bisita it mga Kalibonhon nga si DENR Secretary Roy Cimatu ku Disyembre 1 adlaw nga Biernes. Ro pagpahayag man it Giant Christmas ag mga iwag sa mga kakahuyan sa parke hay gindugangan pa gid it pagbukas Kalibo Pastrana Park Covered Court ag rong Kalibohian sa gabi-i.

Ginpasaeamatan gid ni DENR Secretary Cimatu ro imbitasyon ni Mayor Lachica para pahayagon rong Giant Christmas Tree. Gintaw-an it igtaeupangid ku DENR Secretary ro pagtatap sa basura it Banwa. Gin-mensyonar nana ro rekomendasyon nana nga magtukod it Cluster Sanitary Landfill sa Banwa it Makato kun sa siin pwedeng 5 ka Munisipalidad ro makapilak it basura. Mag-euwas pa gid sa Banwa it Kalibo kun sa siin bantug ro Ati-atihan, gintaw-an man nana it igtaeupangod ro isla it Boracay nga parehas nga naga-engganyo it mga turista ngani kinahang-ean matatap it husto ro mga basura.

Nagta-o man it anang mensahe si Cong. Carlito Marquez sa mga Kalibonhon. Sa ngaean man ni Senator Risa Hontiveros, ginpa-abot man ni SB Member Juris Bautista Sucro ro pagtamyaw it Senadora matapos nga imaw ra ro nagta-o it pondo agud matukod ro Covered Court sa Kalibo Pastrana Park nga gin-inagurahan eon ku Biernes.