• Home
  • Mayor William Lachica, May Ginhinyo sa Mga Kalibo Auxiliary Police

Mayor William Lachica, May Ginhinyo sa Mga Kalibo Auxiliary Police

By: Doniel B Aguirre

Refer to: Ms. Fritzie Anne P Rillo, Information Officer

Ginpa-abot ni Mayor William Lachica sa mga miembro ku Kalibo Auxiliary Police nga pirmeng magtamyaw sa mga drivers nga andang gina-dakup tungod ku nakikita nga mga bayolasyon sa layi it trapiko. Sa ginhimo nga Orientation Re-Orientation Seminar para sa 2nd batch it mga KAP Members kahapon sa Ati-atihan County Inn Small Function Hall, ginpa-butyag it Alkalde nga pirme gid nga magta-o it katahuran tungod ginabasehan it mga drivers ro pagkatawo it mga KAP kun sa siin naga-representar man sa Munisipyo. Gindugang pa gid it Alkalde nga mag-trabaho sa lugar nga gina-postehan tungod ro Munisipyo man makaron hay naga    tinguha nga hipataasan ro sweldo it mga KAP.

Samtang ginpa-abot man ni Engr. Jessie Fegarido, MEEDO Head nga gina-ubra ro seminar pina-agi sa Traffic & Transport Management Division agud tur-an ro mga bag-o nga KAP samtang ro mga datihan eon hay para i-review ro andang mga Duties & Responsibilities. Gusto gid ku MEEDO Head nga sayud gid ku mga KAP members ro ordinansa nga gina-implementar it Munisipyo. Gin-rekomendar pa gid ku MEEDO Head nga mag-review it mga ordinansa kun sa siin pwede sanda makapangayo sa Sangguniang Bayan it Kalibo agud anda gid nga ma-intindihan.

Ro mga Resource Persons nga nagta-o it mga lectures hay ro mga masunod: Valtimor Boy Cunanan, Retired LTO Head it Probinsya, Atty. Reynaldo Ross D Sucgang, Municipal Legal Officer, PO3 Joseph Cavan ag PO2 Roxas it Kalibo Municipal Police Station ag Artemio Arrieta ku Office of the Sangguniang Bayan. Ginaturo man sa seminar hay ro mga masunod: General Traffic Rules & Regulations, Pedestrian, Senior Citizens & PWDS Rights & Welfare, Work Ethics & Behavior, Public Relations & Discipline, Personality Development, Enforcement of Municipal Ordinance, Skills on Apprehending A Traffic Violator, Proposed Traffic/Transport Ordinance, drivers accreditation ag iba pa.