• Home
  • Kaso it mga Aksidente sa karsadahon, ginataw-an eon it aksyon ku Kalibo Municipal Police Station

Kaso it mga Aksidente sa karsadahon, ginataw-an eon it aksyon ku Kalibo Municipal Police Station

01 MAY 2019

Subject: Kaso it mga Aksidente sa karsadahon, ginataw-an eon it aksyon ku Kalibo Municipal Police Station

By: Doniel B Aguirre

Refer To: Ms. Fritzie Anne P Rillo, Information Officer

Bangud ku nagataas nga numero it mga nagaka-disgrasya sa motorskilo sa Banwa it Kalibo, isaeang ka Road Safety Executive Forum ro ginpatawag ni Police Lieutenant Colonel Richard Mepania, Hepe it Kalibo Municipal Police Station sa mga Ahensya it Gobyerno kaparehas ku Land Transportation Office, Dept. of Public Works & Highways, Transport & Traffic Management Unit ag MDRRMO Kalibo kahapon Abril 30 sa Ati-Atihan County Inn.

Suno kay Mepania, tuyo it forum nga mangin safe ro mga karsadahon it Kalibo. Ana pa gid nga ginpabutyag nga ro pag-maneho sa sueod it Kalibo hay nagakinahang-ean it pasensya ag atensyon. Ginpahayag ni Mepania nga kun uwa ka it pasensya ag atensyon, madali ro disgrasya. Ku Enero – April 2018 ro Reckless Imprudence Resulting to Homicide hay 4 ag 3 rong cleared o kun uwa nagkasugot ro partido,  rong Physical Injuries hay 56 ag rong solved hay 38, rong Damage To Property hay 22. Sa Enero hasta it Abril 2019 hay manaba eamang ro reported cases kun sa siin 2 sa reckless imprudence resulting to homicide case, rong physical injuries hay 2 ag 13 sa damage to property sa Banwa it Kalibo.

Bisan manaba eamang ro Statistics ikumpara sa ibang lugar, na-aalarma tungod sa kabuhi ro nakataya, imaw ngani kinahang-ean magtumar it aksyon. Tungod kara, pila sa mga rekomendasyon nga ginkasugtanan hay ro mga masunod: pag-instola it Road Side Warning sa mga mayor nga karsadahon ag rong DPWH ag Municipal Engineering Office ro maga-ubra. Padayon nga paghimo it Checkpoint Operation agud punggan ro mga hilong nga maka-drive it Motorsiklo. Rong LTO ag HPG hay kinahang-ean boe-un ro mga obstruction, rong Kalibo Auxiliary Police hay istriktong maga-implementar it mga traffic rules, paghimo it Traffic Safety Education sa mga Schools ag Brgy. ag rong pag-ubra it kaka-iba ag nakaka-agaw it atensyon nga mga Traffic Signs.