• Home
  • Kalibo Police Station ag Munisipyo it Kalibo, gustong mangin haum sa anuman nga posibleng krisis

Kalibo Police Station ag Munisipyo it Kalibo, gustong mangin haum sa anuman nga posibleng krisis

By: Doniel B Aguirre

Refer to: Mr. Efren Trinidad, Executive Assistant II Office of the Mayor

Angot sa direktiba ku Higher Headquarters it Philippine National Police, isaeang ka Simulation Exercise SIMEX ro ginhimo ku Kalibo Municipal Police Station sa Munisipyo it Kalibo kahapon it hapon adlaw nga Huwebes, Hunyo 22, 2017.

Sa nasambitan nga Simulation Exercise kahapon, sangka Security And Law Enforcement Drill ro ginhiwat kun sa siin gin-praktis ku mga Kapulisan ro mga hilimuon oras nga may matabo nga pagpasabog, pagpamaril ag pagpang-hostage sa mga matawong lugar. Suno kay Police Senior Inspector Honey Mae Ruiz, Deputy Chief of Police it Kalibo Municipal Police Station, tuyo it SIMEX nga masayran ro kahauman ag kaabtik it sangka komunidad.

Ginpahayag nana nga uwa naila ro mga Kapulisan nga matabo iya sa Banwa it Kalibo ro nagakatabo makaron sa Marawi City ag sa Maasin, Iloilo. Tungod kara, ginkasugtanan ku mga Pulis ag Munisipyo it Kalibo ro SIMEX. Ro Municipal Hall it Kalibo ro Vital Installation nga andang ginpili para himuan it SIMEX. Ro sitwasyon nga ginpili ag gintaw-an it magiging aksyon hay ro Active Shooting Scenario, Grenade Explosion ag Hostage Taking.

Sa pagtapos it SIMEX kahapon, gindayaw ku Aklan Police Provincial Office ro Banwa it Kalibo tungod raya pa eamang ro Munisipalidad nga naghimo it nasambitan nga SIMEX, pero ro ibang Police Stations hay may una mat-a nga Camp Defense Plan pero uwa pa naha-samitan nga gamiton sa Simulation Exercise. Para sa mga Kapulisan ku Aklan Police Provincial Office nga nagserbeng Red Team, sadyaan ro pag-ubra it mga Procedures pero nagta-o man sanda it pilang ka mga pahanomdom. Gin-klaro nanda nga ro pagta-o it mga pahanomdom hay bukon it usoyan it saea kundi para mangin tama ag perpekto pag-abot sa minatuod nga sitwasyon.