• Home
  • Ika 122 Anyos nga Anibersaryo ku pagkabaganihan it Desi Nueve Martires it Akean, gin-selebrar ku Munisipyo it Kalibo

Ika 122 Anyos nga Anibersaryo ku pagkabaganihan it Desi Nueve Martires it Akean, gin-selebrar ku Munisipyo it Kalibo

25 MARCH 2019

Subject: Ika 122 Anyos nga Anibersaryo ku pagkabaganihan it Desi Nueve Martires it Akean, gin-selebrar ku Munisipyo it Kalibo

By: Doniel B Aguirre

Refer To: Ms. Fritzie Anne P Rillo, Information Officer

Makahueogan gid ro selebrasyon ku pagkabanihan it Desi Nueve Martires sa anda kara nga ika 122 Anyos Anibersaryo matapos nga ginpakig-sukoe ro aton nga kahilwayan makaron. Sa pagbueoligan ku Lokal nga Gobyerno it Kalibo ag Gobyerno Probinsyal it Akean, malipayon gid nga ginpabutyag ni Mayor William Lachica ro anang pagpasaeamat sa tanan nga nagpartisipar. Gusto ku Alkalde nga mangin inspirasyon it Kalibonhon ro mga hinumuan it mga baganihan ag maghugpong ag magbueoligan sa mga kalisud nga ginapangatubang agud ma-agum ro matuod-tuod nga kahilwayan ag katawhay paadto sa progresibo ag mapag-un nga Probinsya it Akean.

Sa ngaean man ni Gov. Florencio Miraflores, ginpa-abot man ni Vice Gov. Reynaldo Quimpo ro anang mensahe. Base sa Gobernador, 19 ka mga Akeanon nga nagsakripisyo ag naghaead it andang kabuhi agud ma-agum naton ro libertad ag kahilwayan. Agud indi mauyang ro andang pagiging baganihan, pahanumdom nana sa mga nagaserbisyo sa Akeanon nga dumdumon kinahang-ean nanda magserbisyo sa publiko nga may integridad pina-agi sa mayad-ayad nga pagpamanwa. Ginkilaea pa gid ku Bise Gobernador ro mga beterano ag inapo it Deis Nueve Martires, nga nakapanerbisyo sa mga Pumoeoyo it Akean.

Si Representative Carlito Marquez man ro haeangdon nga bisita ku adlaw nga Sabado, Marso 23, 2019. Anang ginpahayag sa presensya ku espiritu it Desi Neuve Martires ag sa andang mga inapo ag mga kaigbataan nga haeos nagdaug eon ro Akean sa kapobrehan bangud ku paghugod it tanan nga Akeanon.

Ginpakita man ku Kalibo Council For Culture & The Arts Performing Arts Guild sa pagbueligan sa Regional Science Highschool For Region VI ag Malinao School for Phil. Craftsmen ro Diez Y Nueve: The Katipunan in Aklan. Samtang ku Marso 22 adlaw nga Biernes, sangka misa it pagdumdum ag paghaead it mga bueak para sa 4 ka taga Nalook nga katapo it Dise Nueve Martires it Akean sa Brgy. Nalook, Kalibo, Aklan.