• Home
  • Gurayan nga indi makaon, ginkumpiska ku Kalibo Public Market ag Agricultural Services Division

Gurayan nga indi makaon, ginkumpiska ku Kalibo Public Market ag Agricultural Services Division

By: Doniel B Aguirre

Refer to: Mr. Efren Trinidad, Executive Assistant to the Mayor

Tungod sa madasig nga pag-monitor ku mga Empleyado it Kalibo Public Market, ginkumpiska ro 73 kilos nga gurayan Skip Jack Tuna nga ginabaligya sa ginabawaean nga lugar sa nasambitan nga tindahan kahapon adlaw nga Lunes. Sa pag-usisa ku mga katapo it Kalibo Public Market, ro nasambitan nga suea hay naghalin pa sa siudad it Iloilo ku Dominggo ag kahapon eamang ginbaligya ag eagi-eagi man nga gin-punggan ro pagbaligya kara sa mga manugbakae.

Suno sa Agricultural Services Division ASD, ro Skip Jack Tuna hay eub-ok eon nga masyado, rong hasang hay maeupsi, ro eawas it isda hay bukon eon it magilak, maputi eon ro sueod it tiyan ngani raya hay indi eon pwedeng kan-on it tawo. Suno sa empleyado ku ASD ro gurayan hay kapamilya it mga tuna, sangka klase it isda nga madugo ngani sa madali nga oras pagkatapos madadawi hay nagakasamad eagi tungod ku presensya it sari-saring mga bacteria. Sa dugang nga pag-eksplekar ku ASD, kun eub-ok ro makarondayang klase it isda, rong Histamine Property kara hay mabaskug ngani sigurado gid nga mag-trigger it Allergic Reaction sa tawo nga makaka-on nga naga-resulta it pagpa-eanga-toe it kaeawasan ag ro iba hay nagakahilo.

Ro 73 kilos nga gurayan hay gin-eubong sa Dumping Site it Kalibo matapos nga raya hay ginpa-baehag sa Kalibo Police Station ku Agricultural Services Division.