• Home
  • Children’s Playground it Kalibo, gin-bendisyonan eon

Children’s Playground it Kalibo, gin-bendisyonan eon

17 JUNE 2019

By: Doniel B Aguirre

Refer To: Ms. Fritzie Anne P Rillo, Information Office

Gin-bendisyonan eon ku Huwebes Hunyo 13, 2019 ro Children’s Playground nga nahamtang sa Kalibo Pastrana Park. Bago ro pag-bendisyon, ginpangunahan nanday Mayor William Lachica, Vice Mayor Madeline Regalado, SB Members it Kalibo, Department Heads it Munisipyo ag iba pa ro Ribbon Cutting bilang simbolo nga pwede eon makapamasyar ag makahampang ro mga inunga sa mga pasilidad nga makit-an sa sueod it parke.

Nagpa-abot gid it pagpasaeamat ag kalipay ro Alkalde bangud sa nakita eon ku Kalibo ro mga P1.5 Million nga haega it proyekto. Suno sa Alkalde, rong desenyo kara hay naghalin sa United Architect Association of the Phils. Aklan Chapter. Suno pa sa Alkalde, kueang pa gid ro pondo ag ro ibang pasilidad ngani kinahang-ean ra dugangan. Pabor man ro alkalde sa suhestyon ni Vice Mayor Madeline Regalado, nga mabutangan ra it bantay ag tatapon bangud sa buwis it pumoeoyo ro gin-gamit nga pondo.

Nagpa-abot man it pagpasaeamat si Engr. Marlo Villanueva, MPDC Head sa ginhimo nga blessing it Children’s Park. Ana kara nga ginpasaeamatan rong Pastrana Park Development Committee nga gintukod ku Alkalde. Gindugang pa gid ku MPDC Head nga ro Munisipyo it Kalibo man hay may gin-baeay eon nga Pastrana Park Development Plan.