• Home
  • Brgy. Mabilo it Kalibo, isaea eon sa baryo nga Drug Cleared Brgy.

Brgy. Mabilo it Kalibo, isaea eon sa baryo nga Drug Cleared Brgy.

02 SEPTEMBER 2019

By: Doniel B Aguirre

Refer To: Ms. Fritzie Anne P Rillo, Information Office

Nakasueod eon sa mga listahan it mga Brgy. sa bug-os nga Nasyon nga Drug Cleared eon ro Mabilo. Sa Monday Flag Raising Ceremony, ginbalita ni Mayor Emerson Lachica nga pasado sa mga requirements kung Phil. Drug Enforcement Agency PDEA ro Brgy. Mabilo it Banwang Kalibo bilang Drug Cleared Brgy. angot sa programa ku administrasyon it pag-tapna sa droga. Suno kana, daywa (2) ka baryo ro gin-aplay it Munispyo sa Over Sight Committee nga ro sambilog pa gid hay ro Brgy. Tinigaw ugaling uwa makapasar.

Dugang kara, ginbalita pa gid ku Alkalde nga ku Agosto 29, 2019, gin-lunsar eon kung Dept. of Information and Communications Technology, DICT ro Free Wi-Fi sa Kalibo Pastrana Park. Ginpa-abot pa gid ni Mayor Lachica nga ro Banwa it Kalibo hay may kaugalingon nga Vibrant Kalibo Booth sa Philippine Travel Mart sa SMX Convention Center. Maabo ro mga nagpabu-oe it litrato sa 2 ka mga miembro it tribu nga nakasuk-suk it Ati-Atihan Uniform bangud nga pinasanyug pa gid nga gina-promote makaron ku Banwa it Kalibo ro Ati-Atihan Festival bilang Mother of All Philippine Festivals.

Ginpadaea pa gid ku Alkalde ro pilang ka mga miembro it Kalibo Sr. Sto. Nino Ati-atihan Management Council Inc KASSAMACO, Inc sa mga lugar ku Mindoro ag Batangas agud magbisita sa mga Local Government Units sa nasambitan nga mga lugar agud mag-promote pa gid it Kalibo Sr. Sto. Nino ati-atihan Festival.