• Home
  • Blood Donation Orientation, Ginhimo Eon Ku Munisipyo it Kalibo sa mga Donors May 14, 2018

Blood Donation Orientation, Ginhimo Eon Ku Munisipyo it Kalibo sa mga Donors May 14, 2018

By: Doniel B Aguirre

Refer to: Ms. Fritzie Anne P Rillo, Information Officer

Ginpa-intiende eon sa mga parent leaders kung 4PS, mga Empleyado ku LGU Kalibo, mga brgy. Health Workers ag iba pang stakeholders ro benipisyo sa pag-donar it dugo angot gihapon sa pagahimuon nga blood donation program ku Munisipyo it Kalibo pina-agi sa Municipal Health Office Kalibo.

Pina-agi kanday Dr. Makarius Tel Aviv Dela Cruz, MHO Kalibo, Dr. Felma Dela Cruz, ag Mr. Roger Debuque, kung Provincial Health Office ag Phil. Guardians Brotherhood Incorporated, ginpa-abot sa mga stakeholders ro importansiya ku pag-donar it dugo iya sa Banwa it Kalibo. Ro indibidwal nga naga-donar it dugo hay may mayad-ayad nga Cardiovascular System, naga-angkon it panibag-ong blood cells, maka-angkon pa gid it mini free health screening, may free counselling ag makabaton it prayoridad kun nagahueam it dugo sa Phil. Red Cross. Ro mga gustong mag-donar it dugo hay kinahang-ean una sa Good Health Condition, para sa mga minor nga naga-edad it 16-17 hay may written consent halin sa anang guardian, sa 18-60 years ro pwedeng mag-donar, samtang ro naga-edad it 61-65 years hay dapat nga naka-donar eon it dugo bago ro andang ika 61st birthday, may timbang nga 110 pounds/50kgs. Pataas ag ro blood pressure hay 90/60 Mmhg hasta it 160/100mmhg. Dapat uwa it alcohol intake sa sueod it 24 oras, nakatueog it bisan 5 oras, naka-pamahaw ag likawan ro fatty food, mag-inum it bastanteng tubi kun sa siin gina-advise gid nga mag-inum it atleaset 1 glass of water bago mag-donar.

450ml eamang it dugo ro iga-donar ag rong proseso it pag-donar hay nagabuhay it mga 5 – 15 minutos eamang. Pagkatapos man nga maka-donar eon it dugo, magpabilin nga naga-eubog sa sueod it mga 10 – 15 minutos, mag-inum it tubi, likawan ro mabug-at nga aktibidad sa sueod it 24 oras, indi man dapat maghakwat it mga mabug-at nga bagay, indi anay mag-entra sa mga sports o workout.

Ginpabutyag man ni Dr. Makarius Tel Aviv Dela Cruz nga sa mayo 21 eon adlaw nga Lunes ro Blood Donation Program ku Munisipyo ag pwede kara maka-donar it dugo ro mga empleyado it LGU Kalibo, mga kapulisan, mga miembro kung pantawid pamilyang Pilipino Program 4PS ag iba pang intresadong mag-donar sa Kalibo Pastrana Park Covered court.