• Home
  • Banwa it Kalibo, suportado nga matun-an ag mabutangan it pondo ro pagtapna sa masakit nga Dystonia o Lubag

Banwa it Kalibo, suportado nga matun-an ag mabutangan it pondo ro pagtapna sa masakit nga Dystonia o Lubag

07 AUGUST 2019

By: Doniel B Aguirre

Refer To: Ms. Fritzie Anne P Rillo, Information Office

Kaeakip eon ro Banwa it Kalibo nga naga-hinyo nga mangin layi rong House Bill 2740 makaron nga nagakilaea sa X-linked Dystonia Parkinsonism XDP o kun Lubag bilang sangka taeagsa nga baeatian it sangka Pilipino ag imaw man ro pagtuga ku XDP Center of the Philippines nga magpanguna sa research ag pagta-o it bulig sa pasyente ag pati man ro pagbutang it pondo sa project/programa ngara. Sa Resolusyon nga ginproponer nanday SB Members Phillip Yerro Kimpo, Jr. ag Kitchie Luces, ginahinyo gid ro mga Kongresista it Pilipinas nga suportahan ro nasambitan nga House Bill nga gina-duso nanday Representatives Fredenil Castro, Janette Garin, Michael Gorriceta, Lorenz Defensor, Teodorico Haresco Jr., Carlito Marquez ag iba pa gid.

Rong XDP hay taeagsa gid nga masakit nga nakikita sa mga eaeaki sa Panay Island kun sa siin nahamtang ro Kalibo. Sa pagtuon ku 2011, 7.7 nga ka mga tawo sa kada 100,000 it populasyon sa Akean ro apektado it XDP. Pwedeng mataas ra bangud sa kaabuan sa mga may masakit hay indi makapabueong o kun nahuya ro andang mga pamilya ag ginakonsidera nanda ra nga sumpa suno sa House Bill. Kueang gid ro pagtinguha ku Gobyerno nga madiskubrehan ro bueong sa XDP ag bukon man it nasakup sa Benefit Scheme kung Philhealth ro mga kinahang-eanon it XDP Patients.

Gina-eauman gid kung Sangguniang Bayan it Kalibo nga ro nasambitan nga Resolusyon hanungod sa pagsuporta kara hay makabulig sa naga-inabo nga numero it mga limog nga naga-kumbinse sa mga kongresista agud nga ro bill hay maipasar bilang laye.