• Home
  • Bag-ong rehabilitar nga Aklan Freedom Shrine, gin-buksan eon kahapon

Bag-ong rehabilitar nga Aklan Freedom Shrine, gin-buksan eon kahapon

By: Doniel B Aguirre

Refer To: Ms. Fritzie Anne P Rillo, Information Officer

Pormal eon nga bukas sa mga magapamasyar ro bag-ong rehabilitar nga Aklan Freedom Shrine nga nahamtang sa Veterans Avenue sa Banwa it Kalibo. Sa pagpanguna ni Mayor Emerson Lachica ag Vice Mayor Cynthia Dela Cruz, dati anay nga Alkalde it Banwang Kalibo Mayor William Lachica kaibahan ro iba pa gid nga SB Members, Department Heads, SP Members Soviet Russia Dela Cruz ag Harry Sucgang, Descendants it 19 Martyrs ag iba pang mga dinapit nga bisita raya hay gin-bendisyonan ag ginbuksan kahapon Oktubre 28.

Sa pagpahayag ni Mayor Emerson Lachica, ro bag-ong rehabilitar nga Aklan Freedom Shrine nga ginpahayag nana nga isaea eon ka National Shrine hay simbolo ku pagka-baganihan it Dise Nueve Martires. Ginpahanumdom ni Mayor Lachica nga padayunon gihapon ro pag-ubra it mayad sa isigka tawo ag tapuson eon ro pagka-makasarili ag hinguhaan nga ro mga pagtinguha it Dise Nueve Martires hay indi ma-amulitan. Ginbilin pa gid ku Alkalde nga ro bag-ong naha-rehabilitar nga National Shrine hay gin-umpisahan sa Administrasyon ni Mayor William Lachica hay kinahang-ean tatapon ag i-preserbar.

Ginpabutyag man ku dating Alkalde nga si William Lachica, nga suportado ku Municipal Development Council MDC ro nasambitan nga proyekto nga naga haega it P2 Million. Ginbalita pa gid dating Alkalde ro pag-trabaho sa Sitio Libuton, Bakhaw Norte kun sa siin tapos eon ro Revetment Wall nga maga-serbeng proteksyon sa nasambitan nga lugar kontra sa mabaskug nga baeod ag baha.

Ginpahanumdom man ni Vice Mayor Cynthia Dela Cruz sa Public Servants nga mangin Modernong Baganihan kaparehas ku Dise Nueve Martires. Ana man nga ginpasaeamatan ro dating Alkalde sa rondayang proyekto.