Archive for October, 2016

Sari-saring pagkaon umpisa sa mga tinuean-on, mga suea nga eaha nga akeanon ag iba pa ro ginabaligya sa baratong presyo makaron sa agricultural trade fair sa kalibo pastrana park maeapit sa gazeebo. Sa pagpamuno nanday mayor william lachica, engr. Jesse fegarido ag sb member buen joy villanueva french, sb member chairperson on agriculture, gin-umpisahan ro pagbaligya it mga mangunguma halin sa mga kabarangayan it kalibo bilang sambilog sa maabong mga aktibidad sa pag-selebrar it ika 445 anyos nga foundation day it kalibo.

Suno kay engr. Jesse fegarido, meedo head, ro agricultural trade fair hay nagapakita ku pagbueoligan it mga agricultural technologist ag mga kabaranggayan nga andang gina-serbisyohan. Nagasalig gid ro meedo head nga sa masunod nga dag-on hay magiging maabo pa gid ro maga-entra nga mga kabaranggayan sa kalibo sa uman nga pagbukas kara sa masunod nga dag-on. Ro aktibidad man hay nakaka-kumbinyo sa mga pumoeoyo nga magpananum bisan nga uwa it mabahoe nga eogta agud matamnan tungod pwede man bisan sa lagwerta it mga panimaeay para sa kaugalingon nga kinahang-eanon.

Suno man mayor lachica, dapat gid nga preparahan pa gid ro paghimo it agricultural trade fair sa masunod nga dag-on agud mas pa gid nga mag-abo ro magapasakup nga brgy.

May plano eon ro munisipyo it kalibo ku uman nga pagbalik it mga dog catchers sa banwa it kalibo. Sa meeting nga ginhimo ku oktubre 25, 2016 ku municipal rabies control committee, gin-hathat eon ro mga plano ag kinahang-ean nga mga kagamitan agud hika-activate eon ro task force dog catchers ag kaeakip man ro public pound operations.

Pina-agi kay dr. Janna rose menez, veterinarian i it lgu kalibo, gina-proponer ku municipal agricultural services division nga itukod ro dog pound sa likod it municipal nursery maeapit sa slaughter house.  Samtang ro dog cage hay gina-plano nga may una nga 12 doors. Pila pa gid sa mga proposals halin sa miembro ku municipal rabies control committee hay ro pag-amyenda it municipal ordinance parte sa pagtatap it mga stray dogs partikular ro pagdugang it probisyon nga ro mga barangay man sa kalibo hay magbulig sa munisipyo nga ma-regulate ro pag-inabo it mga stray dogs, cats ag iba pa sa mga karsadahon. Iga-pasa eon ro project proposal kaeakip ro budgetary requirements sa local finance committee agud mabutangan it nagaka-igo nga pondo agud mapahauman ro uman nga pag-guwa it dog catcher teams sa mga karsadahon sa kalibo.

Kun magiging haum eon ro tanan nga mga kinahang-eanon kaparehas it service vehicle nga paga-gamiton it dog catcher team hay pagahimuon ro dog catching activity 2 beses sa sueod it sang buean.

Sa patik ku mga tamboe ag mga lira, gindeklarar eon ni mayor william lachica ro pag-umpisa ku mga kalibonhon sa pagselebrar it kalibo sto. Nino ati-atihan festival 2017 ku oktubre 21, 2016 sa kalibo pastrana park.  Sa anang pagpahayag, ro ati-atihan festival hay isaeang ka tradisyon, nagapakita it ma-kolor nga kultura ag nagapakita ku madaeom nga pagsalig sa diyos eabi gid kay sr. Sto. Nino. Ginapabugae gid ra it mga kalibonhon sa bug-os nga kalibutan bilang the mother of all philippine festivals.

Napuno gid it kasadya ro mga tribu ag mga deboto ni sr. Sto. Nino, matapos nga nagpakilaea ro mga miss earth 2016 candidates ag pati man ro pag-presentar it  kasafi it mga mutya it kalibo sto. Nino ati-atihan 2016 finalists.

Gindugang pa it alkalde nga kada dag-on, ro munisipyo it kalibo ag rong kalibo sto. Nino ati-atihan foundation inc. (kasafi) hay nagabueoligan agud mapahauman ro selebrasyon nga nagiging espesyal, masadya ag ma-kolor nga pagkinasadya.

Gindayaw ag ginapasaeamatan gid it mga miss earth candidates ro mga akeanon ag kalibonhon tungod gina-preserba gid ro palibot. Suno kay anzhelika tahir, ms. Pakistan, gina-maintan gid it mga pumoeoyo ro manami ag berdeng palibot imaw man ro mainit nga pagbaton kanda it mga pumoeoyo pina-agi sa pagkaway ag paghiyum-hiyum. Ro anda man nga pag-adto sa probinsya it akean partikular sa kalibo hay nakata-o kanda it kahigayunan para makilaea man ro iba pang mga kandidata sa aspeto ku kina-iya it andang mga nasyon, ro isyu it climate change ag ro kultura it pilipinas ag ro mga pagkaon.

Sa andang pag-abot sa bakhawan eco park ku biyernes, sanda ra hay gin-abi-abi ni vice mayor madeline regalado samtang ro mga community guides it munisipyo it kalibo ag bakhawan eco park ro nagta-o it local tour samtang naga-tikang sa 1,200 kilometers nga wooden foot walk it bakhawan eco park.

Bilang pag-amlig sa palibot, ro mga miss earth candidates 2016 hay nagpananum man it mga mangrove propagules.  Ginpanginbulhan gid ku miss earth candidates ro mayad-ayad nga binuhatan it kalibonhon sa pag-amlig sa palibot. Ginadayaw gid nanda ro bakhawan eco park tungod sa nasayuran nanda nga ku nagtaliwan nga mga dinag-un hay puro kabaeasan rong lugar pero nahatamnan eon it mga bakhawan.

Matapos nga aprubahan it sangguniang bayan it kalibo ro resolution no. 2016-013 ku hulyo 21, 2016 nga nagahinyo sa civil aviation authority of the phils. (caap) kalibo para i-alokar ro bakante nga pader sa kalibo international airport arrival area para mangin permanenteng porsyon agud magamit nga pang-promote it kalibo tourism, ginbalita ni sb member phillip yerro kimpo jr. Nga nagpasugot ro general manager it civil aviation authority of the phils. Kalibo nga libreng magamit ro porsyon it arrival area.

Suno kay sb member kimpo, rong tourism and cultural affairs division ro maga-asikaso it mga igabutang sa panel imaw man ro magiging gastos.  Si mayor william lachica man ag ro caap kalibo hay magahimo it pagpirma sa memorandum of agreement ag paga-inagurahan ro panel wall sa tiyempo it paskwa.

Sa rondayang kabangdanan, gin-aprubahan it konseho it kalibo rong resolution no. 067 nga ginproponer ni sb member phillip kimpo jr., nga nagapa-bakud pa gid ku tourism promotions it kalibo sa kalibo international airport imaw man ro pagta-o it gahum sa alkalde para mag-pirma sa memorandum of agreement para sa pagbutang it libreng advertisement sa domestic ag international arrival areas.

Ginahinyo it sangguniang bayan it kalibo sa department of public works and highways aklan district engineering office nga paeson ro mga illegal structures and obstructions sa right of way it natl. Roads sa munisipalidad it kalibo partikular sa roxas avenue umpisa it mabini street hasta gid sa kalibo bridge. Sa draft resolution no. 070 nga gin-proponer ni sb member daisy briones, ginpahayag nga napapan-uhan it munisipyo it kalibo ro naga-inabo nga problema sa trapiko ag seguridad it mga pumoeoyo rason nga nagapangayo it bulig ro munisipyo agud magtumar it aksyon sa mga obstructions ag illegal structures.

Daywa ka mga probisyon it laye ro gintungod sa resolusyon sa siin nagapakita it mga bayolasyon kamana ku section 23 it pd 17 (revised highway act) nga nagapa-andam nga indi pwede gamiton it bisan sin-o ro right of way ag himuon ro anuman nga public highway, tulay ag bisan ano pa nga gamiton it personal ag rong probisyon it national building code of the phils. Ag iba pang mga laye nga nagatakay ku interes it mga pumoeoyo.

Ro kahabaon it roxas avenue umpisa it mabini street paadto gid sa kalibo bridge hay nahamtang sa business center ag institutional zone it kalibo ag kinahang-ean gid nga hibu-oe ro mga obstruction ag illegal structures.  Raya hay  tungod maabo rikara nga mga electrical ag telecommunication posts nga naga-abang sa karsada ag posibleng magta-o it peligro sa mga motorista ag pedestrian, idugang pa gid ro pagparada it mga behikulo sa mansig-ka kilid it highway, ro mga naka-display nga mga goods and merchandise it mga commercial establishment sa sidewalk sa guwa it andang business place.

Ginbalita eon ni mayor william lachica ro pormal nga pagbaton it award it lgu kalibo halin sa phil. Chinese chamber of commerce and industry (pcci) ku oktubre 13, 2016.   Raya hay matapos nga gindeklarar it pcci sa ikaywang kahigayunan nga ro banwa it kalibo hay gin-deklarar bilang most business friendly municipality category i 2016. Suno kay mayor william lachica, banwa it kalibo ro nagpanguna sa tatlo ka mga banwa nga ginpa-idaeom sa search nga gin-award man ni presidente rodrigo roa duterte ro pagpadungog. Tungod kara, ginpasaeamatan gid ni mayor william lachica ro tanan nga mga empleyado ag iba pang mga stakeholders.

Ginpabutyag pa gid it alkalde nga school building pa gid ro magiging premyo kaparehas man ku nahauna nga pagbaton it award. Suno pa sa alkalde, ro grupo ni mr. Lucio tan ag mel robles it pure gold hay nagpahayag it interes nga magpatindog it negosyo. Nagapakilaea eamang nga sadyaan magbutang it negosyo sa banwa it kalibo tungod ku mga improvements ag ma-abi-abihon ro mga pumeoyo.

Ginpa-abot pa it alkalde nga padayunon ro madasig ag maayos nga pagta-o it mga business permits nga kun pwede hay mga 2 days eang hay hika – release eon. Gin-imbitahan pa gid ni mayor william lachica ro mga empleyado nga mag-atender sa opening salvo it ati-atihan 2017 kun sa siin 3o ka mga ms. Earth beauties ro maga-aeabutan. Rong rehabilitation assistance on yolanda ray 3 it dilg hay may posibilidad eon nga hika – release.

Indi eon pagbatunon it munisipyo it kalibo ro mga basura nga bukon it segregated halin sa mga kabaranggayan, bilang pagsunod sa sambilog sa probisyon it r.a. 9003 nga no segregation no collection policy. Sa ginpatawag nga solid waste management board meeting kahapon, ginp-abot it solid waste management office sa kabaranggayan ro andang responsibilidad sa pagtatap it andang mga basura bilang pagsunod man sa istriktong pagpatupad makaron it r.a. 9003 it denr.

Ginpahayag pa ni ms. Adorada reynaldo, it solid waste management office nga ginpa-abot eon it denr nga i-implementar eon ro safe closure and rehabilitation plan sa pagtakup it oktubre ku tanan nga mga open dump facilities ag pati man ro pagpondo it pag-operate it open dump site para malikawan nga hika-iba sa masunod nga batch it mga lgus nga maplastahan it reklamo sa pagbayolar ku r.a. 9003 sa office of the ombudsman.

Sa pagsunod man ku pahanumdom it denr, may ginahimo eon nga tikang ro munisipyo it kalibo parte sa safe closure plan ag positibo si mr. Ariel fernandez, technical adviser of the mayor, nga ro initial phase ag parte ku safe closure plan hay may naha-implementar eon nga proyekto. May back – filling eon ro contractor nga naga-ubra it revetment wall o river control sa river bank it bakhaw sur. May iga-lay out man nga mga pipes nga maga-konekta sa igabutang nga waste treatment plant sa dumping site.

Mabinungahon ro ginpatigayon nga familiarization tour ku kalibo ati-atihan accommodations association (kaaa) inc. Sa siyudad it iloilo ku biernes hasta it sabado oktubre 14 ag 15 it rayang dag-on. Sa pagpanguna ni mr. Gerwin garcia, presidente it kaaa, kaeakip ro iba pang miembro it katc, aktoa, provincial tourism office ag association of kalibo guides nagpatigayon it pagbisita ro mga hotels ag iba pang mga accommodation establishments sa siyudad it iloilo agud maka-adaptar it mga best practices nga sarang magamit sa pagpa-umwad pa gid it andang mga establisimiento sa banwa it kalibo.

Isaeang ka courtesy call ro ginpatigayon sa taeatapan ni atty. Helen catalbas, regional director ku dept. Of tourism region 6. Ginbisitahan rong richmond hotel ag seda atria hotel kun sa siin naghimo it mga mapig-ud nga seminar si mr. Joseph del rosario, general manager parte sa best practices on customer service the seda way sa mga nagsueonod sa familiarization tour.

Gin-adtunan man ro skinetics wellness center bilang sambilog sa sadyaan nga medical tourism destination sa iloilo.  Naghimo man it cultural heritage city tour kun sa siin gin-adtunan ro mga lugar kaparehas ku: nuestra sra. Dela candelaria natl. Shrine, molo mansion (souvenir shops), urban sands iloilo (resort hotel) ag camina (caminaya), balay na bato isaeang ka old house.

Raya man ro ikaywang kahigayunan nga naghimo it familiarization tour ro kaaa kun sa siin ro pinaka-una hay ginhimo ku 2014 samtang ginaplano man ku asosasyon nga maghimo it fam tour sa negros.

Nangin bisita ku banwa it kalibo rong crew it matanglawin, isaeang ka award winning science environmental & educational program sa idaeom ku abs-cbn news & current affairs. Sa komunikasyon nga habaton ku tourism & cultural affairs division, iga-feature it matanglawin ro bakhawan eco park, hand made paper making demo sa papierus pensionne ag tamilok dishes sa lorraine’s tapsi.

Sa matanglwain program, hay may mga gina-feature nga trivia ag useful knowledge sa nagakasari-saring klase it sciences, history ag culture kaeakip man ro mga interesting features ag adventures. Rong host kara hay si mr. Alejandro “kuya kim” atienza, kilaea bilang trivia king it nasyon ag resident weatherman it abs-cbn tv patrol news. Ro mga episodes it matanglawin hay makit-an kada dominggo it mga alas 10 sa agahon ag may replays kada miyerkules bago ro umagang kay ganda, the filipino channel for international abs-cbn subscribers ag iwantv nga sangka online flatform.

Ro banwa it kalibo hay napilian nanda para i-feature bilang kaeakip it andang out of town episodes nga sa makaron hay una pa eamang sa pre-production stage.

Visitor Counter

023032
Users Today : 125
Users Yesterday : 128
This Month : 2441
This Year : 13032
Total Users : 13032
Views Today : 451
Total views : 71137
Who's Online : 1
Your IP Address: 54.80.132.10
Server Time: 2017-10-21

Visit Us